Home 品味生活 率先爆︱李佳芯事件促成 蟲草大王怒抽TVB千萬廣告 明起轉落ViuTV

率先爆︱李佳芯事件促成 蟲草大王怒抽TVB千萬廣告 明起轉落ViuTV

108
0
李佳芯

年廿九,歲晚開戰!
是咁的,李佳芯(Ali)上年同拍拖多年嘅男友陳陳炳銓分手後,一直傳出佢同蟲草大王陳恩德密往,直至周三((26日) 蟲草大王舉行「Pet Paws NFT發佈會」前,咁啱畀傳媒影到二人喺酒店high tea一聚,又有合照流出,緋聞隨之引爆。
向來性格耿直(事後蟲草大王都係咁樣形容)嘅李佳芯,為表清白落重閘,先喺IG Story發聲明,斬釘截鐵話同對方冇任何發展空間,下台階都慳返,翌日甩底蟲草大王嘅發佈會活動。
沒有李佳芯做主角嘅記招,雖然搵嚟有「翻版Ali」蔡潔頂上,但蟲草大王明顯唔收貨兼氣難下,首先佢講佢另一版本,指李佳芯唔係臨時甩底,而係飛起佢唔使出現,繼而轟TVB提出不合理條件,蟲草大王︰「出席活動過程,Ali唔能夠同陳先生單獨影相,即使上台都唔能夠接近陳生,訪問都唔能夠同陳生做。」冇得同Ali合照,嬲嬲豬㗎嘛,焫焫焫着蟲草大王呀!
佢以大客戶嘅口氣向TVB宣戰︰「每年仲會喺佢嗰度落接近兩千萬廣告嘅客戶又有幾多個,真係唔明點解對我哋公司態度咁差,我要話畀佢知我唔好蝦。」之後揚言會抽起晒啲廣告,仲要樂易玲畀個交代佢。
唔好蝦我!就係年廿九,要人家歲晚破財,堅抽起千萬廣告。據知同TVB合作咗廿年嘅陳恩德,曾向TVB投訴,但似乎得唔到佢想要嘅回應,於是一怒下將旗下寵物藥妝,搵蘇志威夫婦拍嘅產品廣告,喺TVB出埋今日(30日)last day,明起轉場去ViuTV,李佳芯事件促成蟲草大王同ViuTV合作。
就此事《娛壹》向蟲草大王旗下寵物藥妝了解,其發言人回覆證實︰「已抽起TVB的廣告,與VIU TV正磋商不同合作機會,未來亦會與不同平台合作。歲晚將至,祝大家身體健康,各位位寵主及毛孩都健健康康,送牛迎虎。」
#李佳芯 #蟲草大王 #陳恩德 #TVB #ViuTV #娛壹